CHANCHIATON

Ang’ gisik sikdika
Attam wal walana,
Chanchie gisiko
Man·jaha sukniko.

Gimaaha bachijok
Da·o ua salrang?
Gapachim kusini
Dongjachim dukni.

Sikrepaia bibalba
Bala balmanode;
Man·taijaha balna
Sikrepgiminrangde.

Pring’ salni nabae
Salde teng·sujokchim,         
Kamko ka·na am·on
Salde salpaksajok.

Ta·rakaia somoiba
Gure kata gita,
Niksrapgija re·angaia
Mikjapsano gita. 

Manden’ janggi tangao
Pangchakani grio
A·bachenga skimani
Kimbik paksa ong·o.

Pante wa·sagiminde
Gisik me·apa gita,
Nokdang ba·ku dongjaoba
Nokdang dakgimin gita.

Niaton saliramchipakko
Gitchaksri salni napangako
Ka·a be·a mikchi jingjang,
Attam salniana.