Rikwarengoniko aro riksrioniko tarigipa Rikgitokko ganna sikode...
ChatGPT da·ona dipetde A·chikku man·kuja. AI-o A·chikkuko napatani uan sakantini daito ong·a. AI-o A·chikkuko ra·gatkujaomangba uade intarneto jeko nika, ukon sebingbangataia. “AI-o A·chikkuko ra·gatna maiko dakna nanga?” ine ChatGPT-o (ba gipin chatbotrang ong·ja maina) sing·ode bang·en mesokgen. Uarangoni sea jotaniba mingsa nangchongmotgipa bak ong·a. A·chikkuchi blog seanirang, website tariarang bang·ahaode, A·chikkuko AI-o napatna altukalgen. Beben, AI-de gimik informationkon chimongade chimongaia. Jawilwat/reels gimikkon. Nang·ni angni social mediao jegrika gimikkon katome chimongaigipasa uade.
Unigimin jawilwat/reels tarienggiparang Englishchi sechape tariode A·chikkuko AI-o napatna uan nang·ni on·gilpaani ong·gen. A·chikkuko AI-o chu·gimik napatsrangnade A·chikku sentence gimikko pe·na nanggen. Jegita hajal lak sentenceba ong·china A·chikkuoniko Englishona pe·na nanggen. Ramram kattade ong·ja. Aro uan saksan dakna man·gipa kam ong·ja. Uko Google sheet ba MS Excel ugita dakgipa sechakanio ritingantikon sena nanggen, mesokan gita indake:
English Garo
I love you. Anga nang·na ka·saa.
Aro ua A·chikku sentencerangko dingtang dingtang mandeni ku·rangchi agane (me·asani ku·rang, me·chikni ku·rang) watdona nanganirangba donggen.
Changsa dakahaode ong·aignok ineba ong·ja, update ka·taitaina nanggen.
A·chikku pe·aniba nengragipa kam ong·taija. District, Subdivision, Block indake pe·na nangchongmotgipa kattarangkon an·chingde A·chikku pe·kuja. Indiba chanchibo – Sastrokon A·chikku pe·na man·ode maina iarangko pe·na man·jawa?
AI modelde intarneto segiminrangonikosa skie ra·a. Jedake – intarneto segimin ki·taprang (Digitized books), songbadrang, rokom rikkit seanirang, golporang, blog seanirang, social mediao seanirang, poraina segimin ki·taprang, sorkarni lekkarang, A·chikku pe·gimin seanirang.
AI pangnan tik ka·e sena jakkalgimin (standardized) ku·sikni grammarko ja·rike seronga. Unigimin A·chikku grammarba onlain dongna nanggen. Indiba iako janapengon saniba segimin grammar ki·tapko intarneto watdoaniko anga miksongja. Jedake gipin ku·sikrangchi intaneto see sandion orto aro grammarko onlain man·a, ua gita chacha man·na nanggen inesa miksonga.
Iarangna agreba AI-o A·chikkuko napatna kam ka·na nanganirang bang·en bang·en bang·en….. gnang.
Iarangde angni tong·kandi aganaianisan aro an·tangni nikanisan. AI-ni gimin sandidapani aro uno A·chikkuko napatani, uan nang·ni aro angni kam ong·a. Haida kampiutarni aro inrtarnetni gimin u·i-ma·siparang (tech savvy) karaie on·chengahaode, sambalna mamingde nengrakalaignokchim(kon).
Chasong tang·dorikrik, seng·ani batrikrik dakbaengon an·chingba ku·tangko ra·doani somai sokaha. Gipinrangde ia kam gimikko matchote ku·tangko AI napatmanaha.
Gimikko ma·sigipakon Google minga inesan anga chanchiachim. Da·o Googleni pagipa AI sokbaaha.
Na·a salanti mobail/intarnet su·dikengon maiko dakenga? A·chikkuko AI-o napatna on·gilpaengama?
Ma, “Ki kore…” ingipa kan·dik jawilwatko niari hihi pitpit ka·dingari dongaienga?
ChatGPT, Gemini, Nano Banana, Perplexity… ingiparangko su·dikate ku·tangko ra·dona on·gilpajawama?
