Madam Te·dil pringnin skulona sokbaaha. November 30 tarik, pringode sin·engaha. Indinba chibimani a·kawe jokona guuri mitmat dakaiengahachim. Koros gimikko mejalon ka·e donahachim. Be·enkode pringo ra·gitikaigen ine Skigipa Orton an·tangan kange ra·angahani gimin jajrengna nangja aro da·omangde ra·manenggnok.
Madam Te·dil skul opiso chipe dongipa bostu katomrangko a·palona bikotengachim. Ua kang·kare rim·jangjange donge koros ka·gimin bosturang chu·ongama chu·ongjawa chanchiengachim. Unon uni chatro saksa nabaaha aro Madamko dakchakeaha.
‘O Johen, na·a sokbaaha?’ Madam sing·soaha. ‘Baosa tela ra·bagen inara?’
‘Angni ripengrang salbaenga, madam,’ Johen aganchakaha.
Aditani ja·mano chatro chatrirang sokbatokaha. Rimbe, Sanita, Te·rikrak, Raksan, Gamseng, Ronita… iamang klas chikkingni bi·sarang nabachengaha.
‘Madam, ia lekka rakgipani bakosora maiasa?’ Raksan sing·aha.
‘Chi botolrangsake uara,’ Madam aganchakaha. ‘Angade botolni chikode brenabe inachim. Ringna namnikja angade. Songtangni chi similako doneming, seng seng dakako ringna namnikja. Angade ringjawa. Simsangniko we·wake ringaigen. Na·simang ringaibo.’
‘Chingaba Simsangnikon ringaigen, madam,’ chatri jinma apsan aganaha.
Skigiparang mitam sokbatokaha. Mitam skigiparangde piknik cha·gipa a·damona re·angsotokaha ina. Indiba chatro chatrirangde gimikan skul sa·raoni re·chakatna nanggen ine hukum on·ani gimin pilakan sa·rao gitchu. Ianon chekchak wil·wal daktokengachim.
Bi·sa jinma jikjakan bilongengjok. Ua jikjakani chu·ongkuja ina gita me·asa bi·sarang maik watatkuaha. Da·o mamingkon knajajok.
‘Baosa tela sokbakujama? Somaide re·angengaha?’ Madam Te·dil git wata baksa aganchakrao aganchapataha.
‘Sokbaaha, madam!’ Me·asarang chrikataha.
Bi·sarang bostu katomrangko telao gataha aro maikkoba re·mikkangchi mikkangate kadeaha.
‘Da·o git wate re·ora, salgimikna betari chu·ongaigenma na·simangnara?’ Madam sing·aha.
‘Ronggni donga, madam,’ bi·sarang chrikaha.
Ia golpoko Riprapni KATTACHIDE TONA AMJA ia gito pangchake seaha. Senokgipa an·tangan Riprapni gitko namnikstapgipa (fan) ong·a. Ia golpona agreba ua Riprapni gitrango pangchake gipin golporangkoba see chapa ka·manaha.
Mandeni bimingrangko aro golpoko senokgipa gisiktangonikosa seaha. Saniba golpo aro bimingrangming apsanode, apsan ong·gakanisan ong·aigen.
Ia golpoko ring·nokgipa Dada Browny baksa golpochengesa seaha. Uni hukumko man·chengesa ia golpoko seaha.
Seani gimikkon senokgipani a·kangani gnang. Senokgipani maming hukum gri, je cholchiba ia seaniko ra·ongkatpanabe. Niamko dakbadepanabe.
Chapa ka·gipa Garrow Mandai
Golpo poraigiparangna namgipa kobor!
Ia golpoko bon·e poraina sikode ba indakgipa golporangko poraisona sikode ia Contact Us ko sikdepe nangarangko gapate watatbo ba biming segatbo. Maiba segitalaniko seatahaon na·simangni mailo u·iatani sokanggen. Ba, Garrow Mandai websiteni Menu-ona re·angeba Contact Us ko kulina man·aigen.
Kusi ong·e poraisobo!
Piknik a·damona sokbaahaoa skigiparang biap namakon kangsoaha ine uamang nikeaha. Gipin dolrangba piknik cha·ani gimin biap namako man·nade tunapani attamon kangsona nanga ba cha·ani salosa re·baa ong·oba pringni re·baskana nanga. Iarang gimikko Skigipa Orton jako ra·ani gimin bi·sarang jajrengmangija kamrangko nengrae a·bachengatna man·aiaha.
Me·asa bi·sarangni skanggipa kamde mai – uan git watani. Uamang bolsal chukalao maikko kadeaha. Da·o uamangni kadegipa maik Simsang chikol gimikko tikka ra·gopaiaha. Gipin dolrangni git watakode dip dip ina gita knaaiaha.
Me·chik bi·sarang Simsangniko chi ko·aha. Merong basee song·aha. Me·asa bi·sarang aro skigiparang be·en rataha.
Pilakni mikkangon kusi ong·ani mikkangchim. Ku·sik rakgipa skigipamangba da·alde bi·sarangming ka·dingwachek dakenga. Bi·sarangba da·alan chol man·enga ingipa gita skigiparangming kal·grike roenga, robol tingrimenga.
Madam Te·dil indinba uade salgro jolni inchagni salario aganan ku·rang ka·sina aro sul sala – da·al sul salade ro·batengachim.
‘O Salgrojolni Nomil Nikchengon ingipa gitkode Madam Te·dilko nien ring·akonmo?’ Johen aganengachim. ‘Dingtangmancha salgroni ma·at miksilget dakpile silnika angade madamkode.’
Riprapni gitrango pangchake A·chik golporangko semanaha. Poraina sikode
https://garrowmandai.com/product-category/book/
Ia linkko sikdepbo☝
Nang·ni do·gacholonan ki·tap sokangaigen.
Rikwarengoniko aro riksrioniko tarigipa Rikgitokko ganna sikode...
‘Nibo, ia saksa – madamtangnan balsrangenga!’ Ripengrang uko ingrime ka·dingstektokaha.
Madamkoba da·alde aganan krakra – salari salgipin skul ka·arango dakmanda ruprup ba kurti gansimaia aro nikgipa gimikan ua bimangkosa gisiko noksa salmana. Indiba da·al jins te·jang gane aro kam ka·na gana plenko te·tenga dakora sila inen aganna man·gen bebe.
Gitni ku·rang rake gam·omangba Madam uamangni inako knasoengachim. Da·alde bi·sarang jekoba agane roaichina; kusi ong·ani salsa, sasti on·ani ong·ja.
‘Raksan, Gamseng, de ianona mi me·dikko de·babo… Rimbe, Sanita, Te·rikrak, Ronita de ia miko sae depbo.’ Ua knaja dake ka·dingsmite hukum chalaimikaha.
Salbelasa ong·engaha. Bijak baditaba dik minaha. Mi song·ade chu·ongaignok. Madam an·chengo am andape me·chik bi·sarangko banda kobi chekchekdilengachim.
Unon Skigipa Orton uni ripengko una mesoke inaha, ‘Ia chingni Madam Te·dil.’
Madam skoo USA nisanni rumalko kopinge kam ka·aoni nidoaha. Ua sal rakao nichakna amjae mikronko skeme niengachim.
Pante sakgipok. Nama tiktak changroa. Jins tangsim ganako ja·patte ok dakgipaona tem·doa. Juttakode oke ro·ongo gate donani gimin ja·rarasa. Ua Skigipa Ortonni okamatako man·e uamang baksa piknik cha·na re·bapaaha.
‘De namaha,’ Madam aganaha. ‘Indiba bi·sarangni pikniksa, chu ringna man·jawane.’
Ortonni ripeng jajajiji dake salamako jakwatna gualpilaha.
‘Bal·ekengasa na·a,’ Skigipa Orton ripengtangko ka·dimeataha. ‘Salgro jolni manderangde indaken bal·ekna gong·a. Knajakrakrangde bebe ra·aigen da·ning, na·aba madamba.’
Madam uni bokgipa wagamrangko naate ka·dingaha.
Uamang wate re·angahaon me·chik bi·sarang maikoba agane ka·dingtokengachim.
‘Mai?… Maine?… Maina ka·dingtokenga?’ Madam apwatgija sing·aha.
‘Ong·ja na·a, madam,’ bi·sarang aganchakaha. ‘Skigipa Ortonni ripengko nang·na krae nikachim inesa.’
‘Hud!’ Madam ka·dingna changjaha.
Unon gitni ku·rang gam·baaha –
‘Kattachide tona amja
Ang’ ka·tongni ka·saako
Kamchi mesokna amja
Anga siana agre;
Indiba aganenga
Anga nang·na ka·saa.
Iakosan agana nang·na ka·saa.’
‘Madam, na·simangni git!’ Me·chik bi·sarang chriktokaha.
Madam ka·o nangna chol man·jaengoba mikdenden dake nie mesokaha. Indiba iade klas ning·a ong·ja, bi·sarang kenani pal batesa ka·dingaiaha.
‘Riprapni git gital! Basako nakataha? Angara mai dake ja·manchakaha? Angade ia kesetko brekuja. Simsanggreo palengahama? Baoniko man·e ia bi·sarang watenga? Salgimik git watengoba ia gitkode watjachimke? Sawa ra·baa? Ma Ortonni ripengan ra·baama?…’ Madam Te·dilni skoo indakgipa sing·anirang apatgija sokbaengachim.
Iachi bi·sarangde maikoba gital man·nasa nangaia, tikkotaan bilongengaha.
‘A·bachengaoni da·alonaba
Dingtangkuja nang·na ka·saa,
Chanchian apsan ning·tua angna
U·ija baditan ka·saa.
A·gilsaknaba jajong askinaba
Aganenga nang·nan ka·saa
Nang’ jakko rim·e salgi nigitdoe
Ku·chakenga kakket ka·saa.’
Me·chik bi·sarang gitni kattarangko knatime jakpa doke rake ka·dingaha. Simsangni rinokgipa rong·bisarang uamangni ku·rangna nadipchangpilengachim. Uamangni ka·dingako knae gipin dolrangba niatpilaha. Madam Te·dil rake mesokengachim indiba uni ku·chil ku·michit dakon mojimaha.
Simsangni boksogimgim an·chengarigipa chikolo ia kattarang janggopengon me·chik bi·sarang gitni doka dam·anirangna ma·gape kusi ong·e jakpa dokengachim. Uamang podni kattarangko man·kujaoba ring·taitaiani sokbaaon jinma grai grai ring·aha:
‘Kattachide tona amja
Ang’ ka·tongni ka·saako
Kamchi mesokna amja
Anga siana agre;
Indiba aganenga
Anga nang·na ka·saa.
Iakosan agana nang·na ka·saa.’
‘Git namamo?’ Madam uamango sing·aha. ‘Na·simangba Riprapni gitko namnikama?’
‘Madam, na·aba Skigipa Ortonni ripengko namnikama?’ Bi·sarang grau sing·ataha.
‘De da·alde na·simangni sal… klas ning·o angni salba sokbaskagenba,’ Madam indine aganon bi·sarang jaksimako songone ka·dingtokaha.
‘Kattachide tona amja
Ang’ ka·tongni ka·saako
Kamchi mesokna amja
Anga siana agre;
Indiba aganenga
Anga nang·na ka·saa.
Iakosan agana nang·na ka·saa.
A·bachengaoni da·alonaba
Dingtangkuja nang·na ka·saa,
Chanchian apsan ning·tua angna
U·ija baditan ka·saa.
A·gilsaknaba jajong askinaba
Aganenga nang·nan ka·saa
Nang’ jakko rim·e salgi nigitdoe
Ku·chakenga kakket ka·saa.’
Me·asa bi·sarang ia gitko ril saldotaitaie wate dongaiaha. Knatimenggipa gimikan mikkosto man·pilengaha. Skigipa Ortonni ripengtang uni keset ril cham·akode maming gitan nikjaha; indiba bi·sarang uni ra·bagipa keset gitalko namnikani gimin rasong chaskaengachim. Uamang ua gitko inditan saldotaitaie wataha je uni ro·ani Simsang chibima baksa jokbrinange Bangladeshona sokangpilaha! Haida Browny ianona re·babebee ring·oba gitok delpilgnokchim!
Attamangahaon mi cha·tokengahachim. Indiba mi cha·mitingomangba Browny neng·takna man·jaha:
‘Kattachide tona amja…’
Bi·sarang mi cha·gittoan Skigipa Ortonni ripengtangko ka·dingsmit dake niattokengachim. Indiba Madam Te·dil uamangko mikdanggip nie sason ka·aha.
BON·AHA
