TE·GATCHU

Aia na·’de te·gatchu
Cha·na chi·sususa!
Foundation layer gittam nonge
Beautician changgipa
Tariata atchraksa!

Rimitjrijri gitchak brina
Nitori’ nang’ mikkang 
Ja·chokchipak tangsek
Maichi togen nang’ bimang! 

Nangja nang·na
A·sakni nonga-sitanirang –
Lipstick, kajal, mascara ba eye liner 
Siltelgipa na·ade
An·tangan an·tang!

Okeaha cha·na 
Gisik kusi gape.
Indioba giltapsaba 
Baosa naman grike!
Be·’n gimikan jo·ong cha·asake!

Maini a·sel ong·aha indake
Angni gisik chanchiao dubiaha,
Mingsani ja·man mingsa dake
Nabarikrikaha –

Namgija balwa balpakama nang·ko
Bibal balmitingo?
Stil ondapama bimango
Chong·kabamitingo?

Ja·pang buring dikpripama?
Wal·ku so·mikjama?
Ge·mangmange donari
Bari nokgipan nikrokjama?

Do·bok cha·sotama
Bipang dal·dromitingo?
Matchu ja·pak sepe be·sotama
Bipang silbamitingo?

Ma, O te·gatchu na·an
Dos nang·o gitchuma?
Bari nokgipa simsakoba
Jo·ong cha·china manchan
An·chake on·ama? 

Dal·dromiting somaio
Skie ra·ani kontao
Kelki gita chokonama?
Klas napgija roama?

Bia, atchiani sal, soba,
Krismas, bilsi gital
Ba festival, kansart;
Ding·ol ong·kate chrokari
Skie ra·nan gualama?

Mobail sikdepdepari
‘Ki kore’ ingipa jawilwatko 
Jamangama niari
Dongaiama ku·angari?

Reels kal·e kamaiode
Namaiachim sabas!
Indiba shorts nie somai galesa
Minaonan ong·aha na·’de timepass!

Sotbongani to chipe
Skuti saljengjengesa,
Skie ra·ani somaio
Chiring chisik roramesa;
Poraini gisikko
Tinsotaha jo·ong nang·ko!

Tangseke bigreng sike
Bite rongrongtee
Dal·dromitingon O te·gatchu –
Bolkambeo dongmitingon
Maina niwilwaljajok?

Sambeng ketchi nichajaesa
Mikkang janggil chanchijaesa
Mikchipari dongesa
Jo·ong cha·a nang·ko indakesa.

Nang·ko cha·oba jo·ong 
Nang·ni bitchilnade ka·sabo,
Uan nang·ni nono jojong
Unade namako skibo.

O na·a jo·ong cha·gipa te·gatchu 
Nang·ko anga gobrangatgnok;
Ronggipin ong·a mairok
Okee nitaignok.